Идиакантни эслайсизми - чуқур сувда яшайдиган, ўзининг даҳшатли кўриниши ва узун ялтироқ тишлари бор? Бугун сизни яна бир чуқур сув вакили - каттаоғиз билан таништираман. Бу ҳам куррамизда яшайдиган қўрқинчли балиқлар рўйхатида олдинги ўринларни эгаллиши мумкин.
Каттаоғизлар Тинч, Атлантика ва Ҳинд уммонининг 500дан 3000 метргача чуқурлигида  яшайди. Улар узун ва энсиз танага эга. Кўринишидан илонбалиқни эслатади, шунга кўра сақоқуш илонбалиқ номини ҳам олган. Нега сақоқуш? Чунки оғзининг остида сақоқуш тумшуғидаги халтани эслатувси улкан халқуми бор.
Каттаоғизлар 60 см гача ўсади. Оғзи танасининг деярли 1/3 қисмини ташкил этади, қолган қисми ортида ялтироқ аъзо жойлашган, думга ўтувчи ингичка илонбалиқсифат танадир.
Каттаоғизда танга, сузувчи қорин, қовурға,  орқа тешик сузгичи ва тўлиққонли суяк склети йўқ. Унинг склети бир неча шаклини ўзгартирган суяк ва енгил тоғайлардан иборат. Шунга кўра бу балиқлар енгилдир. Уларда майда бошсуяк ва кичик кўзлар мавжуд.
Каттаоғизлар кўкрак сузгичлари ёмон ривожлангани учун тез суза олмайдилар. Уларда зўрға кўзга ташланадиган дум мавжуд. Бошқа кўплаб чуқурлик вакиллари каби орқа сузгич ва дум қисми бўйлаб фотофорали тана қисмлари мавжуд.
Ўзининг улкан оғзи туфайли танаси ўзиникидан катта ўлжани юта олади. Ютилган ўлжа ниҳоятда чўзилиши мумкин бўлган ошқозонга тушади. Сақоқуш балиқлар ўзлари яшайдиган чуқурликда учраши мумкин бўлган балиқ ва қисқичбақасимонлар билан озуқланади.

 

С. Азларов